Flutse - Ip café

Flutse - Ip café

Hoenderd joar geleen woaren der vele meer cafés dan nu.  Eén ip de viftien huuzen wast er  een café.  Offisjil of in den duuk.  Nie moeilijk dat al de vinten met een zinder ip roend liepen.

Der was gin tillevisie en winnig vertier.  Sociaal contact dat was de café.  En ojje thuus kwam en je koste nog klappen ton koste je al de nieuwtjes van ’t dorp verteln… tenminste o moeder wilde luustern.

In de cafés was ter vanalles voa joen tamuseren.  Je koste een koartje leggen, veugelpieken, ip de taptoafel speeln, ip de kickerbak speeln…

Loater  kwamt de juke-box en de flipperkasse en in ’t weekend speelde den orgel of een orkestje. 

Vele joenge gasten mochten de zundagachternoene  noa den TAP.

’t Was de geweunte da de visschers ’s nuchtends al begosten te poestern: een kaffie met een dreupel.

Deze die mor een ki in de weke ip café giengen deden dadde achter dhoogmesse.  Achter de messe noa de Rerum.  Koarten voa geld en toerneetjes geven.  Pienten à volonté.  De slimme droenken minder en vroegen een latte chocolat, een gekokt ei of een droge woste. 

En de hele slimme kuusten ulder schippe of ost an ulder toer was voa te trakteren.  Lepe duvels moa da bleef vaneigens nie deuren.  De reste at da rap in ’t snotje.  Drienken ip de poef mochte moa niet te vele !

En wat droenken de vinten: een demi, een drieëndertiger, 25 cc of een boertje.

Een goeie caféboas schoenk nie ip den poef.  Beuter bie de vis.

Ojje vroeger in een café binnen gienk ton wast mistig van de cigarettenrook. Smoren was toegeloaten en de vinten kwamen der an ulder trekken.

Deze die ip café giengen mosten thuus nie liegen.  Moeder rookt van een eure verre dat heur vint in de zeupe gezeten had.

De kleren stoenken lik de peste moa in huus hiengt er ook een walm van cigaretterook.  Ot plafong ofgewassen wierd bie de grote kuus ton wast lik koffiezop da van de meuren liep. Een smoorder in huus en de vrouwe en de kienders kregen ook de nicotine binnnen: passieve rokers zeggen ze doa nu tegen.

In de oede cafés wierd er ook vele gesjiekt ip pruumtubak.  En overal stoenden er spuugbakken.  Der woaren der die goed kosten mikken mor ook vele anderen. Roend die spuugbakken wast een vuule poosie.  ’t Was voa joen ingewanden uut te  broaken. 

Moa ja, da was ton normaal en iedereen voagde dor zien gat an.  Kiezig of nie in de café wast gezellig en de miserie wierd deure gespoeld.