Flutse - Alle doagen feeste

Flutse - Alle doagen feeste

’t Begint al den eersten dag: met Nieuwjoar.  De familie komt tope bie voader en moeder en de wenschen worden uutgewisseld.  Een goeie gezoendheid, da me nog vele meugen meugen en vele kunnen… en ton de voetjes oender toafel.  Wa gomme eten?  Kalkoene, koeietoenge in de Madeira sowse… en binst teeten de nieuwsjoarsbrieven

Liefste meter en peter, hoe meer dajje gift oe beter. Gif je een kluutte ksmieten em deur de ruutte.  Gif je een frank ton zeggenk dank…En gif je niet, je zie me peter/meter niet !

Achter Nieuw Joar ist een periode stille.  Valentijn is een uutviendienge van den Amerikoander. Toet an karnaval.  Vroeger een hoogdag voa de visscherieje.  Iedereen was thuus en iedereen deed een sliptje zeker de diessendag.  In de katholieke schooln en voa de paster was karnavaln doodzoende.  Moa voa de masschers wreed leute.  Café in en café uut en ton woaren der nog vele cafés !  Jammer moa deur Corona gin Carnaval vandejoare…

Achter carnaval kwam Poaschen.  Ip witte dunderdag vertrokken de klokken noa Rome.  Goeie vriedag en stille zoaterdag en ton eiers roapen in den hof.  Achter veertig doagen vasten were chocola in huus da was kerremesse !  Moanden nadien wierd er ier of doa nog wel een ki een eitje gevoenden…

Achter Poasschen kwamen de feesten: kerremesse, communies, moedertjesdag, voadertjesdag.  Een mens herleefde.  De lente brocht de zunne, poaslelies en tulpen, de bomen wierden were groene, ’t seizoen stoend voa de deure.  De grote kuus !

In juli en augustus wast alle doagen leute.  Een crèèmtje lekken ip de diek, luustern noa de muziek van ’t orgeltje van Carolientje, de confetti-bals, dansen met ANCO, de vierwerken van St Michel, troubadour, de processie en de zeewiedienge, de blommenstoet.

En ton zat ’t seizoen ip zien gat.  Vor een jartje de ruuten blenderen, de pliangs ofspijtn…

In ’t achterjoar wast stille.  De joengers noa ’t schole en de vrown druk in de wèr met ulder menoage.  Van ip reize goan wast er nog gin sproake.  ’t Was werken voa toe te komt want de moanden liggen dichte tegen mankoar !  Ip ’t ende van oktober ist nu Halloween.  Nog zukken uutviendienge van den Amerikoander!

In november wast kerkhofbezoek.  Allerheiligen en Allerzielen.  Verkoop van chrysanten met witte koppen die bruun wierden bie deerste nachtvorst.  De familie kwam toope moa echt feesten kost je da nie noemen.  Roend de stove herinneriengen iphoaln.  Oewe dat vroeger was… en binstwille al een ki vroagen wat da Sint Nikloj koste briengen.  De zesden december was een hoogdag voa de kienders.  Een mecano, een boerderieje, koereurtjes, marbels, een top en vorral chocola en marseping en mandarientjes en speculoasjekoekstjes.

’t Was stille in huus want djoengers aan nieuwe bezighoedienge.

Ze kosten al peizen ip  Kestdag en wat dat er oender de kestboom zoe liggen.  De kesteboom zetten en pareren met lamptjes, boln en een pinne.  En nateurlik een keststalletje met de kribbe,  Maria en Jozef, den os en den ezel dherdertjes, iengeltjes en drie keuniengen.  Van Santa Claus wast er nog gin sproake… ’t was de geboorte van ’t kiendje Jezus !