Flutse

Flutse

Ojje de dag van vandoage in de mode wilt zien moe je met een broek met scheuren en plekken roendlopen langs de stroate.  Hoe meer scheuren in de jeans hoe dierder in de wienkel.  Blikwoater moe verschrikkelijk diere zien in Schina.

Vroeger wast ‘t wat anders.  Otter een gat in je broek was tot arranzjeerde moeder dadde.  Ip de kniejn knielappen en ip de been of de biln een laptje met een prentje.

’t Was de tied dat de vrown nie gieng goan werken moa thuus ulder bezigheid hadden.  In de lessen snit en noad aanze leren noaien en patroonn lezen.  De vrown kosten zelve kleren moaken: een klidje, een rok of een bloeze.  En vor ulder vint een broek en een ipperhemde.  En voa de specialisten ook een veste of een paltoo. 

Ieder menoage had een noaimachine.  Poppulair was de Singer.  Met een voettrapper en loater met een moteurtje.  En otter entwadde mankeerde kost je noa de gespecialiseerde wienkel goan.  De mensschen aan vertrouwen in ulder commercanten want on line kopen bestoend nog niet.  Zalando was nog nie uutgevoenden!

Tillevisie bestoend (nog) nie en dus wierd er vele gebreid.  Zokken, koessen, een sjarpe, handschoen en een sjette boj.  Boln sjette wierden gekocht.  Ot de pullover versleten was wierd die uutgetrokken en de sjette gewasschen en ip een bolle gedroaid voa nog een ki te gebruuken.  Onze wuuvetjes kosten dat allemolle en azzo wierd er ook veel geld gespoard.

In den tied wieren der nie zovele komplimenten verkocht an kleren.  De menschen oan zundagse kleren en een werktenu .

Een schoewe die versleten was droegen ze noa de schoenmoaker vor een nieuwe zeule of een hieltje. Nu smieten ze da weg en kopen ze een poar nieuwe schoen.

Van versleten hemden wieren der zakdoeken gemakt.  Versleten oendergoed kreeg een twidde leven als stofslunse.

De wuuvetjes kosten ook stief goed krosjeren: een toafelklidje, oenderleggertjes voa de posteurtjes, een bedspreije, sierkroagtjes…

De vrown woaren heel de dag in de wèèr.  Eten kloar moaken, de bedden moaken, kuuschen, de waste doen, strieken.

De vloer cireren, de ruten wasschen en ipblienken met gazettepapier,’t stof ofdoen.

De commissies doen en zorgen voa ’t geld.

’t Was nog gin “wegwerpmaatschappij.  En “merkkledij” dat was juste mo voa de rieke.