Flutse - Woar is den tied ???

Flutse - Woar is den tied ???

Ojje een ki ip tram zeven zit meug je al een ki peizen an vroeger.  Lat ons zeggen de latste viftig joar.

’t Is vele veranderd.  De menschen zien ook vele veranderd en leven ook anders.  En hoevele keren emme al ni gezeid: mosten onze grootoeders were keren, ze valn doad van ’t verschot.

Al die kleine huuzetjes zien ofgebroken en ip de groend van twee of drieje enze een appartementsgebouw gezet.  De sjieke oede villa’s van ip den diek zien ook weg.  Gin belle-étage nie mè mor een batiment van negen stoaties.  Ip stroate veel ottoos  en ip de geliekvloers vele garagepoorten.  En nu zient allemolle torren !!!  De nenen zien broad is den andern zien schoaduwe…

Voa te parkeren moe je nu betoalen. Gin parkeermeters nie mè en ook gin parkeerautomaten mor een ottootje da hele doagen roend riedt en int passeren fotoos makt.  Ojje nie betoald ed, ejje pries !

Nieverst zieje nog  tillefongkotjes.  Iedereen eed nu een GSM en voral de joenge gasten zien constant bezig met da spil: in den otto, ip ulder villo of te voete.  Ze lopen joen biekans over ende want tenige da telt is ulder tillefong.

Men meegemakt dat de tillevisie kwam.  Cinema thuus: Schipper naast Mathide, kapitein Zeppos, Armand Pien,  de Collega’s.  Eerst in zwart-wit met een antenne ip ’t dek of ip de zolder en loater in kleur met kabeltelevisie zoender storienge en scherp beeld.  En ’t latste was de afstandsbedienienge.

We leven in de luxe moa beseffen het nie altied !

Vroeger mosten we ons wasschen in de kupe… nu ist in de badkamer met een ligbad en/of douche.

De verwarmienge was met kolen: een Leuvense stove en loater een feu continu en drachter chauffage.  Met goaze of met den elektriek.  Of vloervermarmienge…

Alles wierd aan huus gebrocht: de brouwer met toafelbier en woater, de gazette, de melkboer, de bakker, de koolmarchang.

De conteurs van de goaze en den elektriek  en ’t woater wierden ipgeschreven deur personnel dat an de deure kwam.  Nu moeje da zelve invullen en krieg je een poar doagen noadien een facteure voa te betoalen.

De waste  is ook vele versimpeld met die nieuwe wasmachines en droogkassen.  Nie mè noar de bleek en gin waste mè an den droad.  Gin striekiezers nie mè ip de stove mor een stoomstriekiesder met den elektriek.

Met de schuttels ist van ’t zelste.  Wasschen en ofdrogen is verleden tied want nu got allemolle in de vaatwas.  De vloer scheuren en dweiln en cireren da wordt ook nie mè gedoan.

De ruuten wasschen met woater en een bitje azien.  Gedoan.  Nu ist met de spijte.  En ’t blienkt ook.

Alle doagen commissies doen is nu vervangen deur commisies doen met den otto ene ki in de weke.

Brieven schrieven dat is nu electronische post, alles met de computer zelfs noa den andere kant van de wèreld.  Foto’s trekken is van ’t zelfste.  Gin filmptjes nie mè developperen mor alles subiets.

’t Got al vele zidder en de tied vliegt… en wieder worden met de dag oeder.