Een muuleslunse

Een muuleslunse

Flutse

Ojje een joar geleen untwien zag passeren met een slunstje vor ulder moend en neuze ton gieng je zeker een ki joen kop ommegedroaid en joen schoeren ipgestoken én en een ki met joen kop geschud en: were een vrimde die peist dat carnaval nog nie gedoan is…

En de dag van vandoage zie je nietend anders ni mè. Allemolle lopen we met een wit of blow slunstje ip ons oanzichte. En omme wiln sjiek doen ist intje in een ander klurtje, assortie met onze klèren… lik Mathilde.

En omme nu entwien zien die gin muuleslunse an eet ton reclameren wieder. Zeg, ip den diek moe je een masscher droagen hé ! Bluuft in julder kot of doe lik wieder.

Gin feestjes, gin Messe, gin Eerste Commienie of plechtige Commienie. Met Kestdag en Nieuwjoar is de enigste bubbel den deen in de flassche champagne of cava.

Duniversiteit is gesloten omdat de studenten tevele ip café giengn en ’t zwien uuthangn. Al de restaurants en de cafés zien gesloten en eindelik kregen we een poar WC’s der bie.

De tiedden zien veranderd…Corona en Covid 19 ’t is al wat dat de klokke sloat.

De peste, de Spoansche griep, de Aziatische griep…dat is van in de goeien oekden tied. Nu is entwa nieuws… made in China. Voa den eerste ki en de Chinezen entwa gemakt da langer meegoat dan veertien doagen. Ze goan der ip vorruut en wieder achteruut !

Alle doagen ip de tillevisie cijfers over Corona. ’t Goa beter en ton were een pitje slichter. De politiekers wiln versoepeln, de virologen verstriengn. Ski-vakanse met of zoender après-ski. ‘k peinzen in mien eigen: danze thuus van ulder latte geven hé !

Ojje noa de dokteur goat masscher an, noa de wienkel masscher an moa noa de tantiest masscher of.

En ton de piekeuren. Een vaccin of nie. Meug je ton alles doen ? Ip bezoek goan, ip reize goan, feestjes geven? En wien ister ’t slachtoffer… deze dien in ulder kot bluven en broave zien. Of die gin weg nie mè kunn.

Een kluchtje

Flutse zit al moanden zoender werk en ten lange laste magt ie beginnen bie de roste spekkebakker. Moa jis nog nie heel binnen of zien moend zit al vul. Een spekke, een praline, een tartje… bie zoverre dat ie achter drie doagen zien bong kriegt. Jis kwoad en je verstoat er em nie an. Je goa noa de boas die zegt dat ie betoald wordt voa te werken en nie voa teetn. Flutse heel verwoenderd: jammoa je zei gie toch dat deerste weke een proef-periode was !!!