Woar is dadda in godszenoame???

Woar is dadda in godszenoame???

Flutse

Der zien azzo van die plekken in Heist die een eigen noame èn en ojje der van klapt ton weten de joengers nie woa dat dad is. De vrimdeliengen nog vele minder.
Pakt een kir een voarbeeld :

’t Puutepling of de puutjes. Hoevele ziender nog die weten dat dadde nu het Vissershuldeplein is. Vroeger Iweinsplein (zie ons vorig boekje) met een mini-golf en loater fonteintjes met puutjes die woater spuugden. ’t Was gezellig zitten bie de puutjes achter de paravang, uut de wiend.

De bleek. Ip ’t ende van de Steenstroate was ter een gaspling en doar legden de vrown ulder waste te drogen. De witte waste ’s nacht oender de moane… da wierd witter dan wit (Dash bestoend nog niet). Moest je da nu doen ton is den elft van je waste getjoept… weggewoaid zoender wiend)…

’t Sas van Heist. Vroeger kwamen de Stienker en de Blienker uut in de zee en da gebeurde deur sluuzen. Een hele instelloatie. Ik zien de visschers nog altied zitten met ulder kruusnet voa poalienk te vangen. Verleden tied. Voa da Brugge groend ofgepakt eet van Heist voa d‘ hoave van Zeebrugge woaren de voarten de grenze met Brugge.

’t Indioanenkwartier. De Tuunwiek. Die sociale wiek wierd beweund deur een aantal families met een zekere reputoatie. Ojje van Knokke kwam moest je doa zeker passeren en da gieng niet van ’t zels !

’t Bustje. Officieel het directeur-generaal Willemspark. Moar idereen zegt ’t bustje.

De Boulevard. Dad is de graaf d’ Ursellaan. Oender de boulevard was voa d’Heistenoars en de bovenkant was voa de rieke (toeristen). Moa dad is vele veranderd. Vele Heistenoars komn in ulder oeden dag weunen langs de boulevard.

De Square. Ojje klapt van De Kinkhoorn ton ziend er vele die zeggen: dad is alhier nie; Du Square komt eigentlik van de oede noame: Square Albert. Met de fusie is da veranderd.
Knokke had een Albertplein en dus moste Heist van noame verandern.

Kijkdorp. Officieel noemt die verkoavelienge Oostwinkel. In 1973 stoenden an de zuudkant van Heist (achter de tringroute) een serieje gelieke huuzen (verschillende soorten). Die zuk een huus wilde kopen of heuren koste kom kiekken. En iedereen zei ’t is een dorp voa te kieken: een Kijkdorp.

’t Klein marktje. In ’t centrum van Heist wast er een platstje met roend om roend stroaten en vele wienkels: ’t Belgisch Hof, de Franco Belge, apotheker Dumortier, De Lilla Blanc, Musschoot… Alle weken waster markt. De zundag werd er in de vornoene gebasket.

De Statieplatse. Da was het Heldenplein. Doar stoend de tringstoatie en ’t tramkot en an den overkant het Casino-Kursaal da den Duuts ip tende van de orloge in brande gestoken eet. Da was ulder hoofdkwartier.