'K zitten hele doagen alleene

'K zitten hele doagen alleene

Flutse

Ze klappen van acties tegen de eenzaamheid. Oede menschen bezoeken, untwadde organiseren voa de alleenstaanden... Moa oewe komt dadde dat de menschen ulder alleene voelen ? Wien kent er nog zien gebeurs ?

Je moet een ki goed peizen in wavorre wéreld damme tegenwoordig leven. Vroeger kwamt de facteur regelmatig een ki binnen. En 't pensioentje wierd uutbetoald in d'hand. Ie kreegt een poote drienkgeld en een dreupel en der was tied vor een babbeltje.

Ook de wiekagent (damme nu nie mè zien ! 11) sproengt een ki binnen en vroeg of alles OK was. 'K gon mien vuuf minuten zetten... en ie dronk een kaffietje en deed een klaptje. En de wiekagent vroeger wist van ieder menoage oewe dat in mankoar zat met noame en toenoame. En zeker otter een oar in de beuter zat thuus.

De bakker kwam leveren aan huus en de brower ook. De gazette wierd in de busse gestoken moa meestal wierd er gebeld en 't nieuws van de gazette werd an 't toafel besproken en deure gespoeld. En ton sproengt Vostje were ip zien villo en reed verder.

An de voordeure stoend er een pannetje en de melkboer vulde da met een piente melk. Die mens wiste wat dajje nodig had. Loater kwamn der flasschen. En moeder kwam wel een ki kiekken. Moest je da nu doen ze lopen weg met dat kannetje van ip de zulle.

De conteur van 't water, van den elektriek en van de goaze wierden ipgepakt. Were bezoek en were een babbeltje. Volksfiguren lik Pol van 't woater en Guusten van den elektriek...

De flassche Cognac of Elixir d'Anvers woaren nooit van de toafel. Een dreupel min of meer...

En nu ist allemolle anoniem. Betoaliengen doe je nu met de computer: home-banking.

Klappen met mankoar gebeurt langs de telefong. Zelfs on de joenge gasten neffens mankoar zitten beln ze. Voa de goaze, 't woater en den elektriek moeje zelve een bladje invullen en de rekenienge komt met de post. Je moet zelve joen conteur ippakken.

Ojje noa de bank moet ton moeie zelve an de machine tokkelen want de loketten dat is tegenwoordig alleene moa ip rendez-vous. Minder service en meer betoalnü!

De mensschen die nog noa buuten kosten giengen ip de kaffie bie mankoar... en de vinten giengen gon koarten, biljarten, veugelpieken of de spoarkasse anvuln ... ip café. En de latste nieuwtjes wierden thuus besproken. An de keukentoafel.

Velen woaren der in een verenigienge en der wierd uutgekeken noa die vergoariengen. Nu zien al die organisoaties dood ant bloeden. De joenge mensschen moeten ginne mèr en.

't Is de mentaliteit die veranderd is. De mensschen leven nie mè met elkoar moa neffens mankoar. Ot goed goat nog een goeien dag en een goeien avond en ton hoast je, zere wèr je noar huus. 't Is bezige tied. En moa kloagen dat lange doagen zien... ojje alleene zit.